Connect with us

చిత్ర సమీక్ష

సెంటిమెంటుల వ‌ర‌ద కురిపించిన ‘చిన‌బాబు’

Published

on

By: Nasreen Khan

పుట్టించే వాడు దేవుడైతే – పండించే రైతు కూడా దేవుడే అనే డైలాగుతో వ్య‌వ‌సాయ ప్ర‌ధాన‌మైన సినిమా చాలా ఏళ్ళ త‌రువాత వ‌చ్చింది. వ్య‌వ‌సాయం చేసి, అప్పుల బారిన ప‌డి, ఆత్మ‌హ‌త్య‌లు చేసుకుంటున్న రైతుల‌కు మ‌నోధైర్యం నింపే సినిమాగా చిన‌బాబు అని చెప్ప‌వ‌చ్చు. అయితే అతి పెద్ద ఉమ్మ‌డి కుటుంబం, అందులోని ట‌న్నుల‌కొద్దీ సెంటిమెంట్ తో నిండిపోయిన ఈ సినిమా ప్రేక్ష‌కుల‌కు న‌చ్చుతుందా?

క‌థ‌లోకి వెళితే…
రుద్ర‌రాజు (స‌త్య‌రాజ్) కుటుంబం చాలా పెద్ద‌ది. అయిదుగురు ఆడ‌పిల్ల‌ల త‌రువాత పుట్టిన ఏకైక కొడుకు కృష్ణం రాజు అలియాస్ చిన‌బాబు (కార్తి). కృష్ణంరాజు ఒక రైతు బిడ్డ. అయిదుగురు అక్కల ముద్దుల తమ్ముడైన చినబాబును కుటుంబమంతా చాలా ప్రేమగా చూసుకుంటుంది.

టెన్త్ క్లాస్ వరకూ చదువుకుని వ్యవసాయం చేస్తూ తండ్రికిచేదోడు వాదోడుగా ఉంటూంటాడు. ఆర్గానిక్ వ్యవసాయం చేస్తున్న అతనికి ఆ ఏరియాలో మంచి క్రేజ్ ఉంటుంది. మంచి సంపాదన కూడా ఉంటుంది. రైతుకు తిరిగి పూర్వ వైభవం రావాలని, గౌరవం పెరగాలని భావించి అందుకోసం పనిచేస్తూంటాడు. చినబాబును తమ ఇంటి అల్లుడిగా చేసుకోవాలని ఇద్దరు అక్కలు ఆశపడతారు. వాళ్ల కూతుళ్లు కూడా అతడిని ఇష్టపడతారు. కానీ చినబాబు మాత్రం నీరద‌ (సాయేషా) అనే వేరే అమ్మాయిని ఇష్టపడతాడు. ఆమెనే పెళ్లి చేసుకోవాలనుకుంటాడు. దీంతో కుటుంబంలో గొడవలు మొదలవుతాయి. చినబాబు కారణంగా దెబ్బ తిన్న నీరద‌ మావయ్య కుటుంబంలో గొడవల్ని మరింత పెద్దవి చేస్తాడు. దీంతో చినబాబు కుటుంబమంతా ఛిన్నాభిన్న‌మ‌వుతుంది. చినబాబు సమస్యల సుడిగుండంలో చిక్కుకుంటాడు. ఈ స్థితిలో చినబాబు ఈ సమస్యలన్నింటినీ ఎలా పరిష్కరించుకున్నాడు.. తిరిగి కుటుంబాన్ని ఎలా కలిపాడు అన్నది మిగతా కథ.

వ్య‌వ‌సాయాన్ని చిన్నచూపు చూస్తున్న త‌రుణ‌మిది. ఏ ఎన్టీఆర్ సినిమానో, ఏఎన్నార్ సినిమానో క‌ల‌ర్ లో చూసిన ఫీల్ క‌లుగుతుంది మ‌న‌కు. టైటిల్ కూడా కొత్త‌దేమీ కాదు. 1988లో సురేష్ ప్రొడ‌క్ష‌న్స్ బ్యాన‌ర్ పై మోహ‌న్ గాంధీ ద‌ర్శ‌క‌త్వంలో చిన‌బాబు అనే సినిమా వ‌చ్చింది. మ‌ళ్ళీ ఇన్నేళ్ళ‌కు అటువంటి టైటిల్ తో త‌మిళ నేటివిటీతో మ‌న ముందుకొచ్చిందీ సినిమా. కార్తి రైతు అవ‌తారంలో బాగానే ఉన్నాడు. కార్తి కెరీర్లో తొలిసారిగా పూర్తి స్థాయి గ్రామీణ చిత్రంలో నటించాడని చెప్ప‌వ‌చ్చు. ఈ తరహా సినిమాలకు పూర్తిగా దూరమైపోయిన ప్రేక్షకులకు ఇది కొంచెం భిన్నంగా అనిపిస్తుంది. రైతు.. వ్యవసాయం.. ఉమ్మడి కుటుంబం.. అందులో అనురాగాలు ఆప్యాయతల నేపథ్యంలో చాలా స్వచ్ఛంగా సాగే సినిమా ‘చినబాబు’. కాకపోతే విపరీతమైన మెలోడ్రామా.. ఓవర్ డోస్ సెంటిమెంటు కారణంగా ‘చినబాబు’ ఒక దశ దాటాక డ్రామాలా కనిపిస్తుంది. సీను సీనుకు త‌మిళ వాస‌న కొట్టొచ్చిన‌ట్టు క‌నిపించ‌డం మరో సమస్య. ఈ రెండు స‌మ‌స్య‌లు సినిమా చూస్తున్నంత‌సేపూ ఇబ్బంది పెడుతూనే ఉంటాయి.

వ్య‌వ‌సాయం దండ‌గ అనే భావంతో న‌గ‌ర బాట ప‌ట్టిన యువ‌త‌ను, చ‌దువుకున్నా స‌రే… వ్య‌వ‌సాయం చేయ‌డాన్ని మానొద్ద‌నే క‌థాంశంతో ఇప్పుడు సినిమాలు రావ‌ట్లేద‌న్న విష‌యాన్ని ప‌సిగ‌ట్టాడో ఏమో సూర్య తన తమ్ముడిని హీరోగా పెట్టి ఒక స్వచ్ఛమైన సినిమాను నిర్మించాడు. పల్లెటూళ్లలో పరిస్థితులు.. అక్కడి మనుషుల మనస్తత్వాల్ని చక్కగా అర్థం చేసుకున్న పాండిరాజ్.. తనకు తెలిసిన కథనే సినిమాగా తీసినట్లున్నాడు. హీరో అంటే అర్బ‌నైజ్డ్, సినిమా అంటే అర్బ‌న్ క‌ల్చ‌రే ఉండాల‌నే త‌ర‌హాలో సినిమాలు వ‌స్తున్న ఈ రోజుల్లో రైతును హీరోగా పెట్టి సినిమా తీయడం గొప్ప సాహసమేన‌ని చెప్ప‌వ‌చ్చు. రైతు గొప్పదనాన్ని.. వ్యవసాయం ప్రాధాన్యాన్ని సినిమాలో బాగా చూపించాడు. ఒక రైతుకు తాను పెంచుకునే ప‌శువులు కూడా ఇంట్లోని స‌భ్యులే. తాను ఎంత‌గానో ప్రేమించే ఎడ్లు చనిపోతే ఎలా విలవిలలాడిపోతాడ‌నే విషాదాన్ని క‌ళ్ళ‌కు క‌ట్టిన‌ట్లు చూపించాడు ద‌ర్శ‌కుడు పాండిరాజ్. పల్లెటూరి మూలాలున్న వాళ్లు మాత్రం ఈ సన్నివేశానికి బాగా కనెక్టవుతారని చెప్ప‌వ‌చ్చు. సినిమాలో ఇలాంటి మరికొన్ని సెంటిమెంట్ సన్నివేశాలున్నాయి.

ప్ల‌స్ పాయింట్స్ః కార్తీ క్యారక్టరైజేషన్, తమిళ కమెడియన్‌ సూరి కామెడీ, పంచ్‌లు, ప్రీ క్లైమాక్స్ లో వచ్చే ఎమోషన్ సీక్వెన్స్ ఫ‌ర‌వాలేద‌నిపిస్తుంది. సాయీష క్యారెక్ట‌ర్ చెప్పుకోడానికేమీలేదు. ఈ రోజుల్లో హీరోయిన్ సినిమాల్లో ఎలా ఉంటుందో… అలాగే ఉంద‌ని చెప్ప‌వ‌చ్చు. వేల్ రాజ్ సినిమాటోగ్రఫీ బాగుంది. గ్రామీణ వాతావ‌ర‌ణాన్ని చాలా బాగా చిత్రీక‌రించారు.

మైన‌స్ పాయింట్స్ః అన్ని సినిమాల్లో లాగే ఈ సినిమాలోనూ విల‌న్ ఉన్నాడు. అన్ని సినిమాల్లో లాగే ఈ సినిమాలోనూ విల‌న్ అన్నీ చెడ్డ ప‌నులు చేస్తుంటాడు. అలాగే ప్ర‌తి సీన్ లోనూ త‌మిళ వాస‌నే కొట్టొచ్చిన‌ట్లు క‌నిపిస్తుంటుంది. సినిమా ప్రారంభంలో అయితే ద‌ర్శ‌కుడు మ‌రిచిపోయాడో ఏమో కానీ కార్తీ న‌డిపే రాయ‌ల్ ఎన్ ఫీల్డ్ బైక్ పై పేరు కూడా త‌మిళ అక్ష‌రాల్లోనే క‌నిపించింది. త‌రువాత ఫార్మ‌ర్ అని ఇంగ్లీషు అక్ష‌రాల్లో క‌నిపించింది. ఇక మిగిలిన ఊరి బోర్డుల‌న్నీ తెలుగులోనే క‌నిపించేలా జాగ్ర‌త్త ప‌డ్డారు. డైలాగుల విష‌యంలో కాస్తంత శ‌ద్ధ పెట్టాల్సింది. రైతు ప్రాముఖ్య‌త గురించి కార్తీ కాలేజీలో ప్ర‌సంగిస్తున్న‌ప్పుడు, ఆ విద్యార్థుల‌కు నేరుగా అర్థ‌మ‌య్యేలా లేవు. అంతే కాదు… తాను అక్క కూతుర్ల‌ను ఎందుకు పెళ్ళి చేసుకోవాల‌నుకోలేద‌నే విష‌య‌న్ని కూడా స్ట్రెయిట్ గా చెప్ప‌క‌పోవ‌డం మైన‌స్. ఇక ప‌దే ప‌దే…మీరు చూస్తున్నది తమిళ సినిమానే పదే పదే గుర్తు చేయటం ఈ సినిమా ప్రత్యేకత. పాట‌లు ఒక‌ట్రెండు సార్లు విన్న త‌రువాత న‌చ్చుతాయి.

నటీనటులు: కార్తి, సాయేషా సైగల్‌, సత్యరాజ్‌, సూరి, ప్రియా భవానీ శంకర్‌, భానుప్రియ, విజి చంద్రశేఖర్‌ తదితరులు
సంగీతం: డి. ఇమాన్‌
సినిమాటోగ్రఫీ: వేల్‌రాజ్‌
ఎడిటింగ్‌: రుబెన్‌
నిర్మాత: సూర్య
కథ, స్క్రీన్‌ ప్లే, దర్శకత్వం: పాండిరాజ్‌
బ్యానర్‌: 2డీ ఎంటర్‌టైన్‌మెంట్‌

విడుదల తేదీ: 13-07-2018

చిత్ర సమీక్ష

ఒక లాయర్‌కు, హంతకుడికి మధ్య జరిగే ఆటే ‘ఆట‌గాళ్ళు’

Published

on

By

కమర్షియల్ హీరోగా సక్సెస్ కాలేని నారా రోహిత్ విభిన్నమైన కథలు ఎంచుకుంటూ నటుడిగా తనకంటూ ప్రత్యేక గుర్తింపు తెచ్చుకునే ప్రయత్నం చేస్తున్నారు. ప్రస్తుతం టాలీవుడ్లో రోటీన్‌కు భిన్నమైన కథలకు ప్రేక్షకుల నుండి మంచి ఆదరణ లభిస్తోంది. ఈ నేపథ్యంలో థ్రిల్లర్ కథాంశంతో ప్రేక్షకులకు ముందుకొచ్చాడు ఈ నారా వారి హీరో. జగపతి బాబు లాంటి వెర్సటైల్ యాక్టర్ కూడా ఈ సినిమాలో భాగం కావడంతో ప్రేక్షకుల్లో చిత్రంపై మంచి అంచనాలు నెలకొన్నాయి. వీరిద్దరూ కలిసి ఆడిన ఆట ప్రేక్షకులను ఏమేరకు మెప్పించిందో ఓసారి సమీక్షిద్దాం.

కథ ఏమిటంటే…
సిద్ధార్థ్ (నారా రోహిత్) టాలీవుడ్లో అపజయం ఎరుగని టాప్ ఫిల్మ్ డైరెక్టర్. అంజలి(దర్శన బానిక్) అనే అమ్మాయిని ప్రేమ వివాహం చేసుకుంటాడు. అంతా సవ్యంగా సాగుతున్న వీరి కాపురంలో అనుకోని సంఘటన…. తమ ఇంట్లోనే అంజలి హత్య చేయబడుతుంది. సిద్ధార్థ్ మీద అనుమానంతో పోలీసులు అతడిని అరెస్టు చేస్తారు. సిద్ధార్థ్ లాయర్‌ను పెట్టుకోకపోవడంతో ఈ కేసును పబ్లిక్ ప్రాసిక్యూటర్, ప్రముఖ క్రిమినల్ లాయర్ వీరేంద్ర(జగపతి బాబు) టేకప్ చేస్తాడు. హత్య జరిగిన ప్రదేశాన్ని పరిశీలించిన అనంతరం అక్కడ దొరికిన ఎవిడెన్స్ ఆధారంగా హంతకుడు సిద్దార్థ్… కాదని, గతంలో అంజలిని ప్రేమించాలని వెంటపడ్డ మున్నా ఈ దారుణానికి ఒడిగట్టాడని తేల్చేసి… అతడికి ఉరిశిక్ష పడేలా చేసి కేసు ఫినిష్ చేస్తాడు.

 

అసలు ఆట ఇప్పుడు మొదలైంది
తనను కేసులో గెలిపించిన వీరేంద్రకు సిద్ధార్థ్ ఖరీదైన కారును గిఫ్టుగా పంపిస్తాడు. తనకు ఇలాంటివి తీసుకోవడం ఇష్టం ఉండదని, న్యాయం ఎటు వైపు ఉంటే అటు తాను వైపే ఉంటానని చెప్పి ఆ బహుమతిని తిరిగి ఇచ్చేస్తాడు. తిరిగి వెళుతున్న సమయంలో వీరేంద్రకు ఒక షాకింగ్ విషయం తెలుస్తుంది. ఈ హత్య చేసింది మున్నా కాదని, సిద్ధార్థ్ ఈ కేసు నుండి బయట పడటానికి తనను పావులా వాడుకున్నాడని తెలుసుకున్న తర్వాత సినిమాలో అసలు ఆట మొదలవుతుంది.

ఆటగాళ్లు…
అసలు సిద్ధార్థ్ తన భార్యను చంపడానికి కారణం ఏమిటి? న్యాయాన్ని గెలిపించడానికి సీఎంను సైతం ఎదిరించే వీరేంద్ర… ఒక ఫిల్మ్ డైరెక్టర్ ఉచ్చులో ఎలా పడ్డాడు? ఒక లాయర్‌కు, హంతకుడికి మధ్య జరిగిన ఆటలో చివరికి ఎవరు పైచేయి సాధించారు అనేది మిగతా కథ.

Rating : 2/5

Continue Reading

చిత్ర సమీక్ష

లక్ష్మీ – డ్యాన్స్ ఆధారిత సినిమా

Published

on

By

ఇండియన్ మైఖేల్ జాక్సన్ ప్రభుదేవా ప్రత్యేక పాత్రలో మాస్టర్ దిత్య నటించిన చిత్రం లక్ష్మి. డ్యాన్స్ కథా నేపథ్యంగా తెరకెక్కిన ఈ చిత్రంలో ప్రభుదేవ సరసన ఐశ్వర్యా రాజేష్ నటించింది. అభినేత్రి, కణం చిత్రాలను రూపొందించిన ఏఎల్ విజయ్ చిత్రానికి దర్శకుడిగా వ్యవహరించారు. డ్యాన్స్‌ను పిచ్చిగా ఆరాధించే ఓ చిన్నారి తన లక్ష్యాన్ని చేరుకొనేందుకు ఎలాంటి ఆటుపోట్లను ఎదుర్కొన్నదనే కథాంశంతో వచ్చిన ఈ చిత్రం ఆగస్టు 24న రిలీజైంది. ఈ చిత్రం ఏ మేరకు ప్రేక్షకాదరణ పొందిందో తెలుసుకోవాలంటే కథలోకి వెళ్లాల్సిందే.
 
లక్ష్మీ సినిమా కథ 
లక్ష్మి (దిత్య భండే)కు డ్యాన్స్ అంటే పిచ్చి. తండ్రి లేకపోవడం వల్ల తల్లి నందిని (ఐశ్వర్య రాజేష్) సంరక్షణలో పెరుగుతుంటుంది. అయితే డ్యాన్స్ అంటే చెప్పలేనంత అసహ్యం. తల్లికి ఇష్టం లేకున్నా తనలో ఉండే కోరికను అణిచి పెట్టుకోలేకపోతుంది. తల్లికి తెలియకుండా రెస్టారెంట్ యజమాని క‌‌ృష్ణ అలియాస్ వీకే (ప్రభుదేవా) సహకారంతో డ్యాన్స్ అకాడమీలో చేరుతుంది. వీకే గొప్ప డ్యాన్సర్ అనే విషయం తెలుస్తుంది. చివరికి తనకు దూరమైన ప్రేయసి కుమార్తెనే లక్ష్మీ అని వీకే తెలుసుకుంటాడు. జాతీయ స్థాయిలో జరిగే పోటీకి లక్ష్మీ ఉండే గ్రూప్‌ను వీకే సన్నద్ధం చేస్తాడు.
స్టోరిలో ట్విస్టులు
నందిని, వీకే ఎందుకు దూరమయ్యాడు. జాతీయ స్థాయి పోటీలో వీకే చాంఫియన్‌గా నిలువలేకపోయవడానికి కారణం ఏమిటి? లక్ష్మీ నేషనల్ ఛాంపియన్ అయిందా? నేషనల్ ఛాంపియన్ అవడానికి ఎలాంటి అడ్డంకులను ఎదుర్కొన్నది? నందిని, వీకే ఒక్కటయ్యారా? అనే ప్రశ్నలకు సమాధానమే లక్ష్మీ సినిమా కథ.

ఫస్టాఫ్ రివ్యూ 
లక్ష్మీకి డ్యాన్స్ అంటే ఎంత ఇష్టమో అనే విషయాన్ని తెలుపడం, అలాగే వీకే పరిచయం లాంటి అంశాలు తొలి భాగంలో ప్రధానంగా కనిపిస్తాయి. అలాగే స్కూల్‌లో డ్యాన్స్ చేయడం, హెడ్‌ మాస్టర్‌కు దగ్గరవ్వడం లాంటి సన్నివేశాలు ప్రేక్షకులకు కొంత వినోదం పంచేలా ఉంటాయి. కొన్ని రాజకీయాల వల్ల వీకే నేషనల్ ఛాంపియన్ కాలేకపోవడమనే అంశం కథలో కొంత ఆసక్తిని రేపడంతో తొలి భాగం ముగుస్తుంది.
 
సెకండాఫ్ రివ్యూ

సెకండాఫ్‌లో తల్లికి తెలియకుండా వీకేతో కలిసి ముంబైలో ప్రైడ్ ఇండియా డాన్స్ పోటీలకు వెళ్లడం ప్రధాన భాగంగా మారుతుంది. డ్యాన్స్ పోటీలలో శిక్షణ, పోటీలు చాలా ఆసక్తికరంగా కనిపిస్తాయి. కాకపోతే గొప్పగా ఆకర్షించేలా, సన్నివేశాల్లో భావోద్వేగం లేకపోవడంతో చప్పగా సాగిపోతుంటాయి. చివరికి లక్ష్మీకి యాక్సిడెంట్ జరిగి చెవుడు సంభవించడంతో కథ మలుపు తిరుగుతుంది. చెవిటితనంలో మ్యూజిక్ వినకుండా డ్యాన్స్ పోటీలో ఎలా నెగ్గిందనే విషయంపై దర్శకుడు ఆసక్తికరంగా తెరకెక్కించేందుకు ప్రయత్నం చేశాడు.

ఏఎల్ విజయ్

డైరెక్షన్ భావోద్వేగం పండించే కథాంశంగా సినిమాలకు రూపొందించే పేరు ఏఎల్ విజయ్‌కి ఉంది. అయితే లక్ష్మీ విషయానికి వస్తే కథలో ఎక్కడా ఎమోషనల్ కంటెంట్ ఉండదు. బుల్లితెర మీద డ్యాన్స్ ప్రొగ్రాం చూసిన ఫీలింగే తప్ప.. ఓ ఎమోషనల్ కథను చూస్తున్నామనే ఫీలింగ్ కలిగించకపోవడంలో దర్శకుడు విఫలమయ్యాడనే చెప్పవచ్చు. ప్రభుదేవాను పూర్తిస్థాయిలో ఉపయోగించుకోలేకపోవడం మరో మైనస్.
ప్రభుదేవా పెర్ఫార్మెన్స్ 

ప్రభుదేవా లక్ష్మీ లాంటి డ్యాన్స్ నేపథ్యం ఉన్న చిత్రాలు కొట్టిన పిండే అనడం గొప్ప విషయం కాదు. అలాంటి వ్యక్తి నుంచి డ్యాన్స్ నేపథ్యంగా సినిమా వస్తుందంటే ప్రేక్షకుల్లో భారీగానే అంచనాలు ఉంటాయి. కానీ ప్రభుదేవ స్థాయిని మించి ఆశించేలా సినిమా లేకపోయింది. లక్ష్మీ పాయింట్ ఆఫ్ వ్యూలో నడిచే చిత్రంలో అక్కడక్కడ ప్రభుదేవా మెరుపులు మెరిపించాడు. వీకే పాత్రలో భావోద్వేగాలు లేకపోవడం ప్రభుదేవా గొప్పగా నటించడానికి అవకాశం లేకపోయింది.

లక్ష్మీ పాత్రలో 

దిత్య ఇక దిత్య విషయానికి వస్తే లక్ష్మీ పాత్రలో ఒదిగిపోయింది. తొలిభాగంలో చాలా చలాకీగా కనిపించింది. సెకండాఫ్‌లో ఆమె సింగిల్ ఫెర్ఫార్మెన్స్ స్కోప్ తక్కువగానే కనిపిస్తుంది. కాకపోతే మంచి ఈజ్‌తో తెర మీద ఓ మ్యాజిక్ చేసింది. ఇక గ్రూప్‌లో ఉండే మిగితా పిల్లలు చిచ్చరపిడుగుల్లా కనిపించారు.

మిగితా పాత్రల్లో 

లక్ష్మీ చిత్రంలో ఐశ్వర్య రాజేష్ సింగిల్ మదర్‌ పాత్రలో కనిపించింది. ప్రియుడికి దూరమైన భగ్న ప్రేమికురాలిగా, ఓ బిడ్డకు తల్లి లాంటి రెండు విభిన్నమైన పాత్రల్లో నటించింది. కొన్ని సన్నివేశాల్లో మెప్పించింది. సత్యం రాజేష్ పాత్రకు అంతగా స్కోప్ లేకపోయింది. ప్రభుదేవా నిర్వహించే రెస్టారెంట్‌లో సహాయకుడి పాత్రలో అప్పడప్పుడు నవ్వించాడు. సెకండాఫ్‌లో హెడ్మాస్టర్ కోవై సరళ సీన్లు పడిపడేలా ఉంటాయి. రెగ్యులర్‌గా కనిపించే సినిమాలో కోవై సరళ కామెడీ కొంత ఫ్రెష్‌గా ఉంటుంది.

టెక్నికల్ అంశాలు 

లక్ష్మీ సినిమాకు సామ్ సీఎస్ సంగీతం అందించారు. రీరికార్డింగ్ బాగుంది. నీరవ్ షా సినిమాటోగ్రఫీ ఫర్వాలేదు. డ్యాన్స్ పోటీల సందర్బంగా తన పనితీరు మెరుగ్గా కనిపించింది. ఆడిటోరియం బేస్డ్‌ కథ కావడంతో అతని ప్రతిభను బయటకు పెట్టుకోవడానికి అవకాశం చిక్కలేదు. నిర్మాణ విలువలు బాగున్నాయి.

ఫైనల్‌గా …

ప్రభుదేవా, డ్యాన్స్‌పై ఇష్టపడే ప్రేక్షకులకు లక్ష్మీ సినిమా నచ్చుతుంది. దిత్యా, డ్యాన్స్ యాక్టింగ్ ప్రేక్షకులకు కొత్త అనుభూతి కలిగిస్తుంది. వారాంతంలో పిల్లలలతో ఎంజాయ్ చేయడానికి కాలక్షేపంగా లక్ష్మీని చూడటానికి ఓ ఛాన్స్ తీసుకోవచ్చు.

బలం, బలహీనత 
ప్లస్ పాయింట్స్ … ప్రభుదేవా దిత్య డాన్స్ ప్రతిభ
 సెకండాఫ్ … మైనస్ పాయింట్స్ రొటీన్ కథ భావోద్వేగం పండకపోవడం ఫస్టాఫ్‌లో సాగదీత.
 
తెర వెనుక, తెర ముందు 
నటీనటులు: ప్రభుదేవా, ఐశ్వర్య రాజేష్, ఏఎల్ విజయ్, దిత్య, సత్యం రాజేశ్, సల్మాన్ యూసఫ్ ఖాన్ 
దర్శకత్వం: ఏఎల్ విజయ్ 
నిర్మాతలు: ప్రతీక్ చక్రవర్తి, శృతి నల్లప్ప, ఆర్ రవీంద్రన్ 
సంగీతం: సామ్ సీఎస్ 
సినిమాటోగ్రఫి: నిరవ్ షా బ్యానర్: ప్రమోద్ ఫిల్మ్స్, ట్రైడెంట్ ఆర్ట్స్ 

రిలీజ్ డేట్: 2018-08-24

Rating: 2.5/5

Continue Reading

చిత్ర సమీక్ష

జేమ్స్ బాండ్ త‌ర‌హా పాత్ర‌ను ప‌రిచ‌యం చేసిన అడ‌వి శేష్

Published

on

By

By: Nasreen Khan
ఏ కె ఎంటర్ టైన్మెంట్స్ ద్వారా నేడు వరల్డ్ వైడ్‌గా గూఢ‌చారి చిత్రం విడుద‌లైంది. క్షణం సినిమాతో నటుడిగానే కాక రచయితగా కూడా సూపర్ హిట్ అందుకున్న అడివి శేష్ మరోసారి తన కథా కథనాలతో ప్రేక్షకుల ముందుకు వచ్చాడు.  ఈ సారి హాలీవుడ్ త‌ర‌హా జేమ్స్ బాండ్ సినిమాలను తలపించే గూఢచారి కథతో ఆకట్టుకునే ప్రయత్నం చేశాడు. తానే లీడ్‌ రోల్‌లో నటించిన ఈ సినిమాను అభిషేక్‌ పిక్చర్స్‌, పీపుల్స్‌ మీడియా ఫ్యాక్టరీలు సంయుక్తంగా నిర్మించాయి. శశి కిరణ్ తిక్క ఈ సినిమాకు దర్శకుడు. శుక్ర‌వారం ప్రేక్షకుల ముందుకు వచ్చిన ఈ సినిమా ప్రేక్షకులను ఏమేరకు అల‌రిస్తుంది.? రచయితగా అడివి శేష్ ఎలాంటి విజయం సాధించాడు..?
 
కథేమిటంటే…
 ‘రా’ అధికారి రఘువీర్‌ కొడుకు గోపి (అడివి శేష్‌). గోపి బాల్యంలోనే సిక్కింలో జరిగిన ఓ ఆపరేషన్‌లో తండ్రి రఘువీర్‌ చనిపోతాడు. దీనితో రఘువీర్‌ స్నేహితుడు సత్య (ప్రకాష్ రాజ్‌), గోపికి ప్రాణ హాని ఉందని అతడి ఐడెంటిటీ మార్చి అర్జున్‌ కుమార్‌ పేరుతో పెంచి పెద్ద చేస్తాడు. అర్జున్‌ ఎన్ని ఉద్యోగాలు వచ్చినా రిజెక్ట్ చేస్తూ దేశ రక్షణలో తన తండ్రిలా భాగం కావాలనుకుంటాడు. సీబీఐ, ఐబీ, రా ఇలా అన్ని బ్యూరోలకు 174 అప్లికేషన్స్‌ పెట్టుకున్నా ఏ ఒక్క‌దాని నుంచి స్పంద‌న‌ రాదు. చివ‌ర‌గా 175వ సారి తాను మాజీ ‘రా’ అధికారి రఘువీర్‌ కొడుకుని అని మెన్షన్‌ చేసి ద‌ర‌ఖాస్తు చేస్తాడు. ఈ సారి అర్జున్‌కు కాల్‌ వస్తుంది. త్రినేత్ర అనే స్పెషల్ టీం కోసం అర్జున్‌ను ఎంపిక‌ చేస్తారు. అర్జున్‌ తో పాటు మరో ఐదుగురు అదే టీంలో ట్రైన్ అవుతారు. వారిలో బెస్ట్ అనిపించుకున్న అర్జున్‌.. త్రినేత్ర 11గా అపాయింట్‌ అవుతాడు.
 
కానీ అర్జున్‌ అపాయింట్ మెంట్ అయిన రోజే త్రినేత్ర సృష్టి కర్త ఆచారి మీద ఎటాక్ జ‌రుగుతుంది. ఎటాక్‌లో ఆచారితో పాటు కొంత మంది ఆఫీసర్స్‌ కూడా చనిపోతారు. ఎటాక్ చేసిన వ్యక్తి అర్జున్‌ బైక్‌ మీద రావటం, ఆచారిని చంపిన తుపాకి మీద అర్జున్‌ వేలి ముద్రలు ఉండటంతో ప్రభుత్వం అర్జునే తీవ్రవాదులకు కోవర్ట్‌ గా మారాడని భావిస్తుంది. విషయం తెలుసుకున్న అర్జున్‌ తన నిర్ధోషిత్వాన్ని నిరూపించుకునేందుకు అక్కడి నుంచి తప్పించుకొని పారిపోతాడు. అసలు ఆచారి మీద ఎటాక్ చేసింది ఎవరు..? వాళ్లు అర్జున్‌ చేసినట్టుగా ఎందుకు సృష్టించారు..? అర్జున్‌ ఈ మిస్టరీని ఎలా చేదించాడు..? అన్నదే మిగతా కథ.
 
నటీనటులు
బాండ్‌ తరహా కథ కావటంతో సినిమా అంతా అడివి శేష్ పాత్ర చుట్టూనే తిరుగుతుంది. ఇండియన్‌ బాండ్‌లా అడవి శేష్‌ అద్బుతంగా నటించాడు. యాక్షన్, రొమాన్స్‌, కామెడీ, ఎమోషన్స్‌ ఇలా అన్ని వేరియేషన్స్‌ను చాలా బాగా పలికించాడు. తనే రాసుకున్న కథా కథనాలు కావటంతో అవకాశం ఉన్న ప్రతీ చోట తనని తాను చాలా బాగా ఎలివేట్ చేసుకున్నాడు. సినిమాలో జగపతి బాబు ఎంట్రీ ఆడియన్స్‌ కు షాక్‌ ఇస్తుంది. మరోసారి ప్రతినాయకుడి త‌ర‌హా పాత్రలో జగపతి బాబు మెప్పించాడు. కరుడుగట్టిన తీవ్రవాదిగా ఆయన నటన, లుక్స్‌ సినిమాకు ప్లస్‌ అయ్యాయి. అక్కినేని వారసురాలు సుప్రియ రీ ఎంట్రీకి పర్ఫెక్ట్ క్యారెక్టర్‌ను ఎంచుకున్నారు. త్రినేత్ర టీం ఆఫీసర్‌ పాత్రలో ఆమె నటన సూపర్బ్‌. నెగెటివ్‌ షేడ్స్‌ ను కూడా చాలా బాగా చూపించారు. తొలిసారిగా తెలుగు తెరకు పరిచయం అయిన శోభితా దూళిపాలకు మంచి పాత్ర దక్కింది. ఆమె.. గ్లామర్‌ షోతో పాటు నటిగానూ ఆకట్టుకునే ప్రయత్నం చేశారు. మరో కీలక పాత్రలో వెన్నెల కిశోర్ ఆకట్టుకున్నాడు. తాను సీరియస్‌గా ఉంటూనే కామెడీ పండించాడు. ఇతర పాత్రల్లో ప్రకాష్‌ రాజ్‌, మధుశాలిని, అనీష్ కురివిల్లా తదితరులు తమ పరిధి మేరకు ఆకట్టుకున్నారు.
 
రొమాంటిక్ సీన్స్ పై దృష్టి పెట్టాల్సింది
తెలుగు తెర మీద బాండ్ తరహా చిత్రాలు చాలా ఏళ్ల కిందటే వచ్చినా.. ఈ జనరేషన్‌కు పెద్దగా పరిచయం లేదనే చెప్పాలి. అలాంటి ఓ రేర్‌ కాన్సెప్ట్‌తో కథను తయారు చేసుకున్న అడివి శేష్‌.. మనం కూడా బాండ్ సినిమాలను తెరకెక్కించగలమని మరోసారి ప్రూవ్‌ చేశాడు. ఎన్నో చిక్కుముడులతో తయారు చేసుకున్న బాండ్‌ కథను ఏమాత్రం కన్ఫ్యూజన్‌ లేకుండా వెండితెర మీద ఆవిష్కరించటంలో దర్శకుడు శశి కిరణ్ విజయం సాధించాడు. ముఖ్యంగా సినిమాలో ప్రతీ పాత్ర ఓ సర్‌ప్రైజ్‌ ఇచ్చేలా ప్లాన్ చేసిన స్క్రీన్‌ప్లే సినిమాకు హాలీవుడ్ స్థాయిని తీసుకువచ్చింది. ఫస్ట్ హాఫ్‌లో వచ్చే రొమాంటిక్ సీన్స్‌ కాస్త బోరింగ్  గా అనిపించినా.. సెకండ్‌ హాఫ్‌లో ఆ సీన్స్‌కు ఉన్న కనెక్షన్‌ చూసిన తరువాత లవ్‌ సీన్స్‌ కూడా ఓకె అనిపిస్తాయి. అండర్‌ కవర్‌ ఆపరేషన్‌ ఎలా నిర్వహిస్తారు, వారి సెలక్షన్‌ ఎలా జరుగుతుంది, ఎలా ట్రైన్‌ చేస్తారు లాంటి అంశాలు ఆసక్తికరంగా తెరకెక్కించారు. సినిమాకు మేజర్‌ ప్లస్‌ పాయింట్స్‌ సినిమాటోగ్రఫి, బ్యాక్‌ గ్రౌండ్ స్కోర్‌. ఇన్వెస్టిగేషన్‌ థ్రిల్లర్‌కు కావాల్సిన ఇంటెన్సిటీని తీసుకురావటంలో కెమెరామెన్‌ శానెల్‌ డియో, సంగీత దర్శకుడు శ్రీ చరణ్ పాకల విజయం సాధించారు. అబ్బూరి రవి రాసిన మాటలు బుల్లెట్లలా పేలాయి. ఎడిటింగ్, ఆర్ట్‌ ఇలా అన్నీ కలిసి సినిమాను విజయం వైపు నడిపించాయి. నిర్మాణ విలువలు సినిమాకు మరో ఎసెట్‌.
 
ప్లస్‌ పాయింట్స్‌
కథా కథనం
లీడ్‌ యాక్టర్స్ నటన
సినిమాటోగ్రఫి
నేపథ్య సంగీతం
 
మైనస్‌ పాయింట్స్‌
లవ్ సీన్స్‌
టైటిల్ : గూఢచారి
జానర్ : స్పై థ్రిల్లర్‌
తారాగణం : అడివి శేష్‌, శోభితా దూళిపాల, ప్రకాష్‌ రాజ్‌, జగపతి బాబు, సుప్రియా యార్లగడ్డ, వెన్నెల కిశోర్‌
సంగీతం : శ్రీచరణ్‌ పాకల
దర్శకత్వం : శశి కిరణ్ తిక్క
నిర్మాత : అభిషేక్‌ నామా, విశ్వప్రసాద్‌.
 
Rating- 3/5

Continue Reading

Trending